Sojojin Najeriya Sun Amince Da Jefa Wa Masu Maulidi Bam Bisa Kuskure A Kaduna

Gwamnatin jihar Kaduna, a ranar Litinin, ta ce rundunar sojin Najeriya ta dauki alhakin jefa bam a Tudun Biri da ke karamar hukumar Igabi a wurin Mauludi a jihar Kaduna wanda yayi sanadin mutuwar mutane akalla 120 a ranar Lahadi.

Tun da farko dai rundunar sojin saman Najeriya ta musanta alhakin mutuwar da aka ce ta kashe mutanen.

Arewa Times Hausa ta tuna cewa an kashe mutane da dama a kauyen Tudun Biri da ke karamar hukumar Igabi a jihar Kaduna bayan da wani jirgin soji ya jefa bam a yayin da ake gudanar da bukukuwan Mauludi.

A kalla mazauna garin 120 ne suka mutu a lamarin wanda ya faru da misalin karfe tara na daren Lahadi.

Idan dai za a iya tunawa, rundunar sojin saman Najeriya ta musanta alhakin kai harin na bam.

Sai dai kwamishinan tsaro na cikin gida da harkokin cikin gida Samuel Aruwan, ya ce babban hafsan runduna ta 1 ta Najeriya da kwamandan rundunar Operation Whirl Punch, Manjo Janar VU Okoro, ya amince cewa sojojin Najeriya na ci gaba da yaki da ‘yan ta’adda a kullum, lamarin da ya kai ga faruwar hakan.

Hakan na kunshe ne a cikin wata sanarwa da kwamishininan ta raba wa manema labarai jim kadan bayan da mataimakiyar gwamnan, Dakta Hadiza Balarabe ta gana da malaman addinin musulunci, da sarakunan gargajiya, da shugabannin hukumomin tsaro, inda “Rundunar sojin Najeriya ta bayyana halin da ake ciki wanda ya kai ga kai harin bisa kuskure.”

Sanarwar ta ci gaba da cewa: “Kwamandan runduna ta daya ta sojojin Najeriya, Manjo VU Okoro, ya bayyana cewa sojojin Najeriya na ci gaba da gudanar da ayyukan su na yaki da ‘yan ta’adda amma bada gangan suka shafi al’umma ba.

Ya kuma kara da cewa har yanzu ana ci gaba da aikin ceto da kuma ceto mutane da dama da gwamnatin jihar ta kwashe wadanda suka jikkata zuwa asibitin koyarwa na Barau Dikko.

Aruwan ya kuma ruwaito mataimakiyar gwamnan ya jajantawa iyalan wadanda abin ya shafa yayin da take addu’ar Allah ya jikan wadanda lamarin ya shafa.

“Gwamnatin jihar Kaduna ta samu bayanai kan harin da aka kai daren Lahadi wanda yayi sanadin mutuwar ‘yan yankin da dama tare da jikkata wasu.

“A taron da mataimakiyar gwamna, Dakta Hadiza Balarabe ta jagoranta, wanda ya samu halartar shugabannin hukumomin tsaro, na addini da na gargajiya, rundunar sojin Najeriya ta bayyana halin da ake ciki wanda ya kai ga harin daba a so ba.

“Kwamandan runduna ta daya ta sojojin Najeriya, Manjo VU Okoro, ya bayyana cewa sojojin Najeriya na ci gaba da gudanar da ayyukan su na yaki da ‘yan ta’adda amma ba da gangan suka shafi al’umma ba.

“Mataimakin gwamnan a karshen taron na sirri, ya mika sakon ta’aziyyar gwamnati da al’ummar jihar Kaduna ga iyalan da suka rasa ‘yan uwansu tare da addu’ar Allah ya jikan wadanda lamarin ya shafa.

“Ya zuwa lokacin wannan sabuntawa, ana ci gaba da bincike da ceto, saboda an kwashe mutane da dama da suka jikkata zuwa asibitin koyarwa na Barau Dikko,” in ji shi.

Daraktan kungiyar ta Amnesty International, Isah Sanusi, ya ce jami’an kungiyar na nan a wurin da lamarin ya shafa, inda suka kirga sama da mutane 120 da suka mutu a tashin bam.

Ya ce, “Ina iya tabbatar muku cewa adadin wadanda suka mutu a yankunan da abin ya shafa ya kai fiye da mutum 120.”

Ya bayyana cewa akwai akalla gawarwaki 77 da aka binne a kowane babban kabari biyu, inda ya jaddada cewa adadin wadanda suka ce sun mutu ya zarce yadda NEMA ta bayyana na mutane 85.