Shugaban Kasar Rwanda Yace Zai Sake Tsayawa Takara A Karo Na Hudu

Shugaban kasar Rwanda Paul Kagame ya bayyana a karon farko cewa yana shirin sake tsayawa takara karo na hudu a zaben da za a gudanar a shekara mai zuwa.

“Eh, hakika ni dan takara ne,” Kagame, wanda ya yi mulkin kasar da hannu a shekaru da dama, ya shaida wa Jeune Afrique, wata mujallar labarai ta Faransa, a wata hira da aka buga ta yanar gizo ranar Talata.

“Na yi farin ciki da kwarin gwiwar da ‘yan Ruwanda suka ba ni. A koyaushe zan yi musu hidima, muddin zan iya,” an jiyo dan shekaru 65 yana cewa.

A watan Maris ne gwamnatin Rwanda ta yanke shawarar daidaita ranakun da za ta gudanar da zabukan ‘yan majalisar dokoki da na shugaban kasa, wadanda za a yi a watan Agustan shekara mai zuwa.

A baya dai Kagame bai fito fili ya bayyana aniyarsa ba, amma ya jagoranci sauye-sauyen tsarin mulkin kasar a shekara ta 2015 wanda ya ba shi damar yin tazarce da kuma ci gaba da mulki har zuwa shekara ta 2034.

Tsohon babban hafsan ‘yan tawaye, Kagame ya zama shugaban kasa a watan Afrilun 2000 amma ya kasance shugaban kasar na gaskiya tun karshen kisan kare dangi na 1994.

An mayar da shi ofis – da fiye da kashi 90 na kuri’un – a zabukan 2003, 2010 da 2017.

Mutum daya daya tilo da ya kalubalanci Kagame a zabe mai zuwa shi ne shugaban jam’iyyar adawa ta Green Party Frank Habineza, wanda a watan Mayu ya bayyana aniyarsa ta tsayawa takara a shekarar 2024.

Ya ce shirin shugaban na sake tsayawa takara a shekara mai zuwa “ba abin mamaki ba ne”.

“Ba ma tsoronsa, muna samun tsari da kyau a matsayin jam’iyyar siyasa don yin yakin neman zabe fiye da yadda muka yi a 2017. Muna da kwarin gwiwa,” kamar yadda ya shaida wa AFP a Kigali.

“Dimokradiyya gwagwarmaya ce don haka za mu ci gaba da gwagwarmaya ta hanyar dimokuradiyya don samar da sararin siyasa da dimokiradiyya, bin doka da kuma ‘yancin ɗan adam a Ruwanda.”