JAMB: Sabon Makin Shiga Jami’a Da Kwaleji

Hukumar shirya jarabawar shiga jami’o’i ta kasa (JAMB) ta kayyade maki 140 domin shiga jami’a.

Magatakardar hukumar Farfesa Is-haq Oloyede ne ya bayyana hakan a ranar Asabar a yayin da yake gabatar da jawabi a taron shekarar 2023 kan shiga manyan makarantu da bayar da kyaututtuka da aka gudanar a Abuja.

Oloyede ya kuma lura cewa hukumar ta amince da maki 100 a matsayin makin da aka kayyade ga manyan makarantu da kwalejojin ilimi.

Sai dai magatakardar JAMB ta ce jami’o’i suna da ‘yancin yanke makin da za a yanke amma babu wata jami’a da za ta amince da duk dan takarar da ya samu maki kasa da makin 140.

Har ila yau, a taron manufofin, gwamnatin tarayya ta bukaci hukumar ta JAMB da ta kiyaye tsarkin jarrabawar ta a kowane lokaci.

Babban sakataren ma’aikatar ilimi, David Adejoh, ya ce tsarin jarabawar da aka yi watsi da shi zai yi illa ga ma’aikatan kasar.